Kategorio: Artikoloj

Aperis la unua numero de la revuo Kontakto preparita de la nova redaktoro, Rogener Pavinski. En intervjuo de Libera Folio li konstatas, ke ne nur la abonkvanto sed ankaŭ la kvalito de la revuo falis dum la lastaj jaroj. Per novaj rimedoj li esperas altiri pli da atento al la periodaĵo. Ĉu al tiuj rimedoj apartenos ne nur duonnudaj virinoj, sed ankaŭ simile vestitaj viroj, tion Rogener Pavinski ankoraŭ ne volas malkaŝi. Sed lia Kontakto celas esti interesa por ĉiuj esperantistoj, ne nur gejunuloj, kaj li esperas dum du jaroj kreskigi la eldonkvanton almenaŭ je 30 procentoj.

La neĝo falis, degeliĝis, denove falis kaj finfine, post du monatoj, la kristnask-temaj reklamoj jam iom sencas. Lernantoj ĝojatendas ripozon dum ferioj, studentoj iomete pli ago-plenan ekzamen-periodon. Sed ĉiukaze dum jarŝanĝo oni ĉiam trovas ian tempon por festi. Ĉe kelkaj estos iom pli sobra familia festo, ĉe aliaj diboĉema urba aŭ malfacile priskribebla enkabana. Spertuloj pri la fako certe konfirmos ke la plej bonaj festoj tamen estas tiuj neplanitaj, sed se vi ŝatus festi kun geamikoj de duono de la mondo, ni povas konsili. Jam ekde pli ol duon-jarcento okazadas en meza Eŭropo novjaraj esperantistaj renkontiĝoj, kaj ĉi-jare kompreneble ne estos escepto.

La unua Ago-Semajno (AS) ekster Pollando okazis inter 27.12.2008 kaj 4.1.2009 en Slovakio, en la urbo Liptovský Mikuláš. Danke al kunlaboro de Pola Esperanio-Junularo (PEJ), Varsovia Vento, Slovakia Esperanta Junularo (SKEJ) kaj Liptova Esperanto-Klubo (LEK) okazis ĝis nun la plej granda internacia junulara E-aranĝo en la historio de memstara Slovakio, kun la partopreno de pli ol 160 personoj de 25 landoj. Signife helpis al la realigo de la aranĝo ankaŭ la urbo Liptovský Mikuláš mem, kiu plurmaniere subtenis la aranĝon.

La legantoj de “Kontakto” estas invitataj paroli pri literaturo. Temas kaj pri la literaturo ĝenerale (historio, skoloj, problemoj), kaj pri apartaj literaturaj verkoj.